Dad Naggue Dubir dule negwebur, Gunayala Banamayalagi. Danigudo muubillibogwa igar anna nigga sedanimardo, belagwa dagsurmardo demar binsa nabir nayob, Dagmala dulemar anmar aguedi, anmarga mas dagsi, negwebur ganiggid agala anmarga muubilli burbanigagwa. Demar agued dadagan nagan obesnade, demar sed, diwie dadgaed wisid, anmar saglamar namagardaed abali anna bulagwa onmaggedneggi igarmasi.
Nana baba igargine, muubillide nabgwanabogwa bassisuli, bela anna iddagbugwa, anna mussumussu iddage neg nuedi seega. Anmar igar mesismalad iggi muu agwelogoe. Anmarga obelenasddo, nanga wagdardad nosale burwigan ounae, saglamar namaggedba, nangan gasgi goe namaggedgine, dadgan muddigba wagganga gasgi ebbene neggusmalad inmardurgangi wilesmalad sunmagmadaed.
Gunayalagine bonigan daglesurmaladi dagleardo, eneganba negdagmaladad abbor negsabisado, saggi dumagan iagar sadde mied, blasddicomar laddamar milemaid we anmar daed suli, bar anmarga sergan obesad sasulibardo. We bonigan nosabbali, omega danagwen binsarmardo mer yoguegala anmar sergan igar obesmalad demar igi agwelege ganar igar nue mesergebe, narmagergebe igar mamai mer yogwega, neggweburmar ogannoemalaga, bela nue inmardurgan demar bugwad sabgubugwa mimigan danigoedga, massergan omeganga asig anmar addagoe.
Wegi egi arbalesa bag nan anmarga sogsad obesadba imaglesa, igi omaggeneggi sugmalege, bela anna iddagbugwa burwigana, sabbingana. Bela muugan, muugan igar wismala, uasolamad. We iddaglesa anmar ganar nan bab igar mesisad insaega gannar eba daega. Balamiega ibu obare muubilli agwed, igi demargi inmar durgan bugwa igi nue agwelesale ised wisi abelege. Daggegarba ibumar gwagmai galumarnai, igi nuegweburde igar semamoga.
We binsaed dagsamalgi ise dagleardo gunasdulemargala galudumagan nanaid demargi nabbaneggi bela anna idagbugdo mussumussu. Demargi inmar durgan e nugmala emala sabbimarbo geb inmardulaganbo we oyodo nabba sogwenad. Sergan anmarga odurdasnade galu dumagan mele ese warmagmalo, agine burba nueganbugwa anmarbin nagwelebugwa deggine be nue agwemarsullile sun neg uweleged nague. Omegan, igarmar yoggusmalad amismalad, muubilli agued, bia galu biriamar nanaid wemar burba niggad neg ganigid, nagwelebugwa mer bonigan uboega agwar billi dummagangi nanai.
